Татар Казысы авылыннан Шәйхетдиновлар шәхси ярдәмче хуҗалык белән ничек идарә итүләре турында сөйләделәр

Татар Казысы авылында яшәүче Кәүсәрия һәм Азат Шәйхетдиновлар зур шәхси ярдәмче хуҗалык белән ничек идарә итүләре турында сөйләделәр.

– Без аларны ирем белән бергә карыйбыз. Иртәнге 3.15тә уянабыз, терлекләр янына бергә чыгабыз, ашатабыз, эчертәбез, моның өчен ике сәгать чамасы вакыт кирәк. Аннары өйгә керәбез, мин сөтне аертам, эремчек сөзәм, каймак тутырып куям, әлеге эшләрне башкарган вакытта, көндез тормыш иптәшем терлекләрне карарга чыга. Кичен дүрттә тагын терлекләр янына бергә чыгабыз, – дип сөйли Кәүсәрия Галихан кызы. – Бездә башка акча эшләү чыганагы юк, без шуның белән яшибез. Казан, Питрәч ерак урнашкан, безнең авылда эшләргә урын юк. Абзар төзү өчен миллион сум кредит алдык. Трактор, йөк машинасы сатып алдык. Печәнне без үзебез үстерәбез, чабабыз, үзебез ташыйбыз. Безнең унышар гектарлы ике җир участогы бар. Фуражны сатып алабыз, – дип сөйли хуҗабикә.

Үгезләрне яхшы итеп симертәләр. Тере авырлыкта алар кайвакыт биш центнерга җитәләр, алардан өч центнерга якын ит алалар. Мөгезле эре терлекләрдән сыер асрау отышлырак, алар көн саен 25-30 литр сөт бирә, ә үгезне ике ел буе үстерергә кирәк, диләр.

Ишегалдында тагын ике ат бар, аларны гаилә башлыгы Азат Гайнетдин улы ярата.

– Минем күптәнге хыялым – ат чабышларында катнашу. Әлегә планда тагын берничә ат сатып алу. Бәлки, казылык эшли башларбыз, – дип планнары белән уртаклашты Азат Гайнетдин улы.