Питрәчле «Созвездие-Йолдызлык» фестивалендә җиңүче булды

«Созвездие-Йолдызлык» республика яшьләр фестиваленең йомгаклау гала-концерты 19 апрельдә узды. «Пирамида» мәдәни-күңел ачу комплексында И.В. Аухадиев исемендәге Казан музыка көллияте студенты Роберт Миңнуллин «Эй ухнем» рус халык җыры белән чыгыш ясады һәм «Вокал-соло» номинациясендә (олы төркем) беренче урынны яулады. 

Талантлы егетне грамота, кубок һәм медаль белән бүләкләделәр. Аны район башлыгы Илһам Кашапов та котлады.

- Дөресен генә әйткәндә, мин чыгыш ясаганда җиңү турында уйламадым. Тамашачыларга ошасын өчен матур җырларга кирәклеге турында гына борчылдым. Җиңүем белән, һичшиксез, бик канәгать, - дип тәэсирләре белән уртаклашты Роберт.