Безнең районда региональ юлларның дүрт участогында ясалма яктырткычлар урнаштырыла

Осиново бистәсендә Ленино-Кокушкино ягына таба 850 метр арада юл буенча яктырткычлар барлыкка киләчәк. Хәзерге вакытта  монда эшләр бара. Җирле халык та эшнең нидә икәнен аңлап алды инде.

- Без кич белән эштән кайтканда, электр хезмәткәрләренең ничек эшләвен күрдек. Тиздән яктырткычлар барлыкка киләчәген аңладык, - ди Әнисә Егорова. – Моңа бик сөендем, чөнки  һәрчак юл читеннән балалар белән барган җәяүлеләр өчен борчыла идем. Караңгыда аларны күреп булмый иде, - дип сөйләде ул һәм зур рәхмәт белдерде. Шулай ук Салкын Чишмәдә – тукталыштан Бутырка авылына таба 350 метр арада шундый ук яктырткычлар урнаштырылачак. Әлеге юл янында берничә йорт урнашкан. Аларның берсендә яшәүче Лилия Касыймова ике яшьлек бала белән урамда еш йөри.

Шулай ук ул күптән түгел машина белән йөри башлады. Без  яшь ана-автолединың  бу турыда фикерен белдек. - Әйбәт булачак, юлның машиналар йөри торган  өлеше яхшырак күренәчәк, - ди ул.

- Ленино Кокушкинода да күпердә яктырткычлар куелса, бик әйбәт булыр иде әле. Кичләрен йөрергә бик куркыныч, - дип уртаклашты ул безнең белән.

Салкын Чишмә һәм Осиновода октябрь ахырына кадәр урам уты урнаштырылачак.