Янсуар авылыннан Валерий Федотов Чернобыль АЭСында өч атна була

Бөтен ил белән бергә питрәчлеләр дә аның нәтиҗәләрен юк итүдә катнашалар, алар арасында Янсуар авылыннан Валерий Федотов та бар. Мәктәпне тәмамлагач, аны хәрби комиссариаттан Казан ДОСААФына «механик-шофер» белгечлеге буенча укырга җибәрәләр. 1984 елда ул Саратов өлкәсенә химия гаскәрләренә хәрби хезмәткә китә. Ике ел сизелми дә үтә, Валерий полкташлары белән бергә өенә җыена, чөнки демобилизация вакытына берничә атна гына калган була.

– Питрәч районыннан без өчәү идек – мин, якташым Яков Константинов һәм Әлбәденнән Валентин Ильин. Без барыбыз да механик-шофер булып хезмәт иттек, химик разведка машиналары руле артына утырдык. Без чын армия тормышын үттек, атуга һәм стройга хәрби әзерлек, атом станцияләрендә һәм полигоннарында уку дәресләре, Балтыйк буе өйрәнүләре булды. Безнең хәрби часть кечкенә иде, шуңа күрә барыбыз да дус булдык, – дип сөйләде минем әңгәмәдәшем.

Фаҗигале шимбә төнендә аларны тревога белән торгызалар һәм шунда ук поезд белән Чернобыль ягына таба озаталар.

– 29 апрельдә иртәнге сәгать дүрттә без инде урында идек, поездда ук безгә противогазлар, респираторлар кияргә куштылар. Без анда өч атна булдык, атом станциясенең төрле урыннарында радиация дәрәҗәсен үлчәдек. Безнең экипаж беренче тапкыр 30 апрельдә төнге сәгать 12дә зарарлану зонасына эләкте. Урынга тәүлегенә бишәр тапкыр махсус саклагыч бронемашиналарда механик-шофер, химик-разведчик һәм офицер, бүлек командиры составында бара идек. Без аннан чыккан саен яхшылап юындык, ә киемнәребезне яндырдык, – дип искә ала ул.

Питрәчле бер айдан соң өенә кайта. Армиядә хезмәт иткән вакыты һәм Чернобыль АЭСы аның хәтерендә мәңгегә кала. Бергә хезмәт иткән иптәшләре белән хәзер дә аралашып торалар, элек хат алышканнар, хәзер телефоннан шалтыратып сөйләшәләр. Ике ел рәттән хезмәт иткән частьларына барганнар: частьның юбилеена һәм аварияның еллыгына. Ә якташ-армиячеләр һәр бәйрәмдә, чараларда бергә җыелалар һәм аларны гаиләләре белән бергә үткәрәләр. Алар һәрвакыт бер-берсенә булышырга әзер.

Валерий Дмитриевич туган авылы Янсуарда яши. Күрше Саба районыннан Надежда Алексеевнага өйләнә, ир белән хатын бер ул һәм бер кыз үстерәләр, хәзер аларның дүрт оныгы бар.

Армиядән соң үз авылында тире җыючы, шулай ук иминият агенты булып эшли. Хәзер Чытының «Шәле-Агро» бүлегендә ындыр табагы склады мөдире. Ул ашлык кабул итүне һәм таратуны, ә чәчү эшләре вакытында басуларга орлык һәм минераль ашламалар җибәрүне контрольдә тота.