Әлеге бәйрәм 2009 елда Дәүләт башлыгы Указы белән гамәлгә куелган.
Питрәч район суд приставлары бүлегендә 15 хезмәткәр эшли, аларның икесе – Ксения Хөснетдинова һәм Алинә Галләмова.
.jpg)
“МИН ҮЗ ЭШЕМНЕ ХӨРМӘТ ИТӘМ ҺӘМ ЯРАТАМ”
Ксения Хөснетдинова Казанда туып-үсә, шунда ук урта мәктәпне тәмамлый. Балачакта ук эчке эшләр органнарында эшләргә хыяллана. Барысы да кинофильмнар, детективлар аркасында була, Ксюша аларны карарга ярата.
Тугызынчы сыйныфтан соң ул Казан социаль-гуманитар техникумының юридик факультетына укырга керә. Аннары институтны тәмамлый, аннан кызыл диплом белән чыга.
Шул арада аның гаиләсе Питрәчкә күченә. Ксения Олеговна әңгәмә уза һәм суд пристав-башкаручысы була.
– Минем хыялым чынга ашты дип әйтергә була, – дип билгеләп үтте ул. – Мин үз эшемне хөрмәт итәм һәм яратам, шулай да, һәр эшнең үз авырлыклары бар. Кайвакыт төн уртасына кадәр утырырга туры килә. Ләкин зарланмыйбыз, үз язмышыбызны үзебез сайладык. Башта декреттагы хезмәткәр урынында эшләдем. Ул чыккач, мин суд утырышлары секретаре булдым. Шул вакытта элеккеге эшемне юксындым. Шуңа күрә, вакансия барлыкка килүгә мине кире чакырдылар, мин бик теләп ризалаштым, – дип искә ала ул.
Ксения Олеговна офиста гына утырмый, ул урыннарга чыга, авыр тормыш хәленә эләккән гражданнар белән аралаша. Аларның һәрберсенә психолог ролендә якын килергә тырыша, чөнки төрле характерлы һәм әхлаклы кешеләр очрый. Игътибар белән тыңлый, кеше хәленә керергә һәм проблеманы хәл итәргә ярдәм итәргә тырыша.
Аның буш вакыты аз булса да, тугыз яшьлек улы Даниэльгә зур игътибар бирә. Малай футбол белән шөгыльләнә, әнисе аны секцияләргә йөртә.
“ҺӨНӘРЕМНЕ ҮЗГӘРТҮЕМӘ ҮКЕНМИМ”
Алинә Галләмова мәктәп эскәмиясеннән рус теле укытучысы булырга теләгән. Ләкин Ленино-Кокушкино урта мәктәбен тәмамлагач, дуслары белән Казан икътисад институтына укырга керә. Ләкин хезмәт эшчәнлеген суд приставы-башкаручысы вазифасында башлый. Эчке хезмәтнең өлкән лейтенанты Алинә Дамировна хәзер инде тәҗрибәле белгеч.
– Мин беркайчан да үз һөнәремне үзгәрткәнемә үкенмәдем, – диде ул. – Шулай килеп чыкканына шатмын. Институтны тәмамлагач, үземне бу өлкәдә сынап карарга тәкъдим иттеләр. Миңа, син булдырачаксың, диделәр. Чынлык - та, мин яңа эшкә тиз ияләштем. Барысын да тиз үзләштердем, әкренләп тәҗрибә тупладым, хезмәттәшләр белән бергәләп эшлибез, берберебезгә ярдәм итәбез, бергәләп теләсә нинди бурычларны хәл итәбез. Бу вазифада инде биш елдан артык вакыт үтте, – дип сөйләде Алинә Дамировна.
Аларның эше бертөрле генә түгел, төрле ситуацияләр була, әмма һәрвакыт уңай моментлар табарга, килеп туган хәлне уңай хәл итәргә тырышалар. Һәркемнең үз участогы бар, район халкы елдан-ел арта, шуның белән эш өстәлә. Бик мәшгуль булуына карамастан, Алинә Дамировна гаиләсенә вакыт таба. Ире Айнур белән бергә алар ике кыз тәрбияләп үстерәләр – җиде яшьлек Жасмин һәм 2,5 яшьлек Асель.
– Ирем, әти-әнием ярдәм итә, ярый әле алар бар, – дип сүзен тәмамлады яшь ана.
Бүлек җитәкчесе Илзирә Зарипова
– 2023 елның 10 ае нәтиҗәләре буенча район суд приставлары карамагында 23506 башкару производствосы (1468277 сумлык) бар иде, шуларның 12347се (518872 сумлык) башкарылды.
Безнең хезмәт катлаулы һәм киеренке дәүләт эшен башкара, аның уңышы һәр хезмәтнең һәр хезмәткәренең компетентлылыгына һәм профессиональлегенә бәйле. Суд приставлары югары профессионализм, фидакарьлек, хезмәт бурычына тугрылык күрсәтәләр. Коллегаларыма яңа хезмәт җиңүләре, барлык яхшы ниятләренең тормышка ашуын, уңышлар һәм һөнәри эшчәнлектә яңа казанышлар телим.