Питрәчнең “Айгөл” балалар бакчасында язны каршы алдылар

Балалар бәйрәм хуҗабикәсен көткән арада алып баручылар - татар теле тәрбиячесе Галина Малова һәм тәрбияче Миләүшә Шәйхетдинова, аларны бәйрәм тарихы белән таныштырды. Бакчага йөрүчеләр Нәүрүз бәйрәменең элек-электән көн белән төн тигезләшкән көнне яңа ел буларак билгеләп үтелүен, Нәүрүзнең дуслык бәйрәме булуын тагын бер кат исләренә төшерде. Балаларга Нәүрүзбикәне (Ирина Мөхәммәтҗанова) бәйрәмгә чакырып китерүдә Су анасы (Светлана Козина) ярдәмгә килде. Аны Убырлы карчык (Әлфия Шералиева) үзен бәйрәмгә чакырмаган өчен үпкәләп, балалардан яшереп куйган булган. Ниһаять, балалар Нәүрүзбикәне күрү бәхетенә иреште. Әмма аңа кабат үз хокукларын яклар өчен сынаулар аша үтәргә туры килде. Көтмәгәндә алар янына үзенең салкыннары белән Кыш бабай килеп керде, ә бу юлы Нәүрүзбикәгә балалар ярдәм итте. Алар Яз сылуына Кыш бабай (Раиса Чукурова) белән аркан тартышуда җиңәргә булышты. Нәүрүзбикә Кыш бабайны биергә чакырды, әмма Кыш бабай язның гүзәллегенә, җылылыгына каршы тора алмады. Саубуллашыр алдыннан Кыш бабай һәркемгә шигырь юллары ихлас теләкләрен җиткерде:

- Дуслар эшегез уң булсын,

Теләгегез юш булсын,

Күңелләрегез хуш булсын,

Нәүрүз мөбарәк булсын!

Бу көнне бакчада тәрбияләнүчеләр рус һәм татар телләрендә яз һәм әлеге бәйрәмгә багышланган шигырьләр, җырлар башкарды. Алар бигрәк тә "Түбәтәй", "Кәрия-Зәкәрия" җырлы-биюле уенында яратып катнашты. Гомумән, ата-аналар тәрбиячеләрнең әлеге чара аша балаларда халкыбызның гореф-гадәт һәм йолалары белән кызыксыну уятуга зур игътибар бирүләренә куана гына.