Һәм тагын ул духовкада мич коймаклары рецепты белән уртаклашты
«Кулларың алтын» – үз эшенең осталары турында шулай диләр. Бу билгеләмә Кубра апага да туры килә. Ул бик тәмле пешерә, бу осталык аңа еллар һәм тәҗрибә белән килгән. Кем әйтмешли, тормыш барысына да өйрәтә.
Һәр уңайдан
Мәдәният йортында үткәрелгән чарамы, гаилә бәйрәмеме – Кубра апага еш мөрәҗәгать итәләр. Коймак, кош теле яки карабодай бәлеше пешерүен сорыйлар. Камыры уңсын өчен аны ничек әзерләргә икәнен ул үз тәҗрибәсендә өйрәнә, башта аның да камыры ертыла торган була. Иң мөһиме – аны ярты сәгать чамасы изәргә кирәк, дип билгеләп үтә ул. Ә эшкә күңел белән яратып якын килә белү тагын да мөһимрәк.
Коймакларны ул берничә ел элек Шәледәге туганнарыннан алган рецепт буенча пешерә башлаган. Ул аларны авылда уза торган иң зур вакыйга – итекле хоккей чарасына әзерләгән. Алты литр коймак камырын пешереп бетерүгә өч сәгать вакыт киткән.
– Бик теләп пешерәм. Балалар бит салкында уйныйлар, башка районнардан киләләр. Кайнар чәй һәм коймак белән рәхәтләнеп сыйланалар, – ди ул.
Аннары ул бу рецептны гаилә табыны өчен дә куллана башлый, һәм барлык теләүчеләрне өйрәтә. Шулай итеп рецепт берсеннән икенчесенә күчә. Хуҗабикәнең өйдә һәрвакыт пешкән ризыгы бар. Без кайтканда да коймаклар белән бергә кош теле дә ясаган иде.
– Чәйне берүзем эчмим. Һәрвакыт кемне дә булса: дусларымны, туганнарымны, балаларымны сыйларга чакырам. Ашарга пешерергә яратам, бу минем хобби, – ди ул.
Сигез баланың иң кечесе
Кубра Бәдретдин кызы – Чытының үзеннән. Ул сигез балалы гаиләдә үскән. Әти-әниләре аны эшләргә алай мәҗбүр итмәгәннәр, иркәләгәннәр һәм яратканнар – иң кече балалар белән күбесенчә шулай була. Аның «кобра» сүзе белән аваздаш исеменең барлыкка килү тарихы кызыклы.
– Безнең авылда Кубра абыстай булган. Күрәсең, миңа да шулай дип исем кушарга булганнар. Бу исем Коръәндә өч тапкыр очрый. Мәктәптә миңа аны алыштырырга да киңәш иттеләр, ләкин мин башка исем алмадым. Бүгенге көндә үземнең гадәти булмаган исемем белән горурланам: ул сирәк очрый, башка районнарда да очратканым бар. Мин нәкъ менә аның аркасында танылдым. Узган ел минем янга блогер да килде, – ди ул елмаеп.
Яшь вакытта ул Казанга китә, үзе ашарга пешерергә өйрәнә –- һәм аның бик яхшы килеп чыга. Өйдә коймакны тыныч кына пешереп бетерер өчен, кухня ишеген ябып куярга да туры килә, югыйсә тәлинкәдә коймак калмый. Аннары инде барысы бергә өстәл артына утырышып чәй эчәләр.
Каенанасы да оста хуҗабикә була. Килене авылда элек өч көн барган бер генә туй да аның ярдәменнән башка үтмәгәнен искә төшерә. Кубра Бәдретдин кызы 1978 елда күрше егете Илфатка кияүгә чыга. Ир белән хатын 40 елдан артык бергә яшәгәннәр. Тормыш иптәше моннан алты ел чамасы элек вафат булган. Алар өч бала үстерәләр – ике кыз һәм бер малай. Лилия Питрәч район үзәк хастаханәсендә эшли, Ләйлә – шәхси ярдәмче хуҗалык белән шөгыльләнә, Илшат – комбайнчы. Алар әниләренә алты онык бүләк иткәннәр.
Кубра Мөхәммәтгалиева авылның иҗтимагый тормышында, шул исәптән волонтерлыкта да актив катнаша. Авыл халкы, нигездә пенсионерлар, авыл мәдәният йортына җыела һәм бергәләп СВО зонасына җибәрү өчен мендәрләр тегә. Анда да ул еш кына чәй эчәргә үзе пешергән берәр ризык алып бара.
Рецепт
Ингредиентлар:
- 50 г чүпрә
- 1 аш кашыгы шикәр (чүпрәне күпертү өчен) + 1 аш кашыгы (камырга)
- 5 аш кашыгы он (күпертү өчен) + камырга (куерганчы)
- 1 стакан җылымса су
- 1 л сөт
- 3 данә йомырка
- 1 бал кашыгы тоз
- Көнбагыш мае һәм атланмай – яртышар стакан (атланмайны эретергә)
Әзерләү:
1. Башта чүпрәне кабарту өчен сыек кына камыр ясыйбыз. 50 г прессланган чүпрә, 1 аш кашыгы шикәр, 5 аш кашыгы он һәм 1 стакан җылы су салабыз. Болгатабыз һәм 20-30 минутка кабарырга куябыз.
2. 1 л сөт җылытабыз (кайнатмыйбыз). Аннан соң аңа 1 аш кашыгы шикәр һәм 1 аш кашыгы тоз өстибез.
3. 3 йомырканы аерым күпертәбез, аннары камырга өстибез.
4. Көнбагыш мае һәм эретелгән атланмай кушабыз – һәрберсе яртышар стакан булырга тиеш. Камырга өстибез.
5. Он өстибез. Камыр куе булырга тиеш.
6. Камырны 15-20 минут җылыда тотабыз.
7. Коймакны бер ягы ярым әзер булганчы плитәдә кыздырабыз. Аннары духовкага 5 минутка өске рәшәткәсенә грильга куябыз. Духовканы алдан ук җылытып куярга кирәк. Ахырда кайнар коймакларны атланмай белән майларга кирәк.
