«Пестрецы-2013» командасы Түбән Камадан яшьтәшләрен кабул итте
Питрәч хоккейчылары үз бозларына кайттылар. Яңартылган «Питрәч-Арена» боз сараенда ремонттан соң беренче рәсми матчлар узды.
Идел буе федераль округы беренчелеге кысаларында «А» төркемендә «Пестрецы-2013» командасы (тренерлары Александр Евграфов һәм Константин Игнатьев) Түбән Камадан яшьтәшләрен – «Нефтехимик» командасын кабул итте.
Ике уен да мавыктыргыч һәм киеренке узды. Беренче көнне безнең команда 4:3 исәбе белән җиңү яулады (алкаларны бездә Данила Луньков, Максим Поляков, Кәрим Низаметдинов һәм Айзат Сәйфуллин кертте).
Икенче көнне кунаклар реванш алдылар һәм шундый ук исәп белән җиңделәр – 4:3 (голлар Мәгъсүт Хаҗипов, Наил Мифтахов һәм Айзат Сәйфуллин исәбендә).
Шулай итеп, командалар очколарны бүлештеләр.