Чиратта – арпа һәм җитен.
“Җитез булмасаң, акча эшләп булмый!” – диләр комбайнчылар. Әле генә зур кырның яртысында рапс үсеп утыра иде, күз ачып йомганчы 15 комбайн инде соңгы рәтләрне суктырып, гигант колонна булып икенче басуга таба агылды.
Уртак тырышлык нәтиҗә бирә
Шәле авылы янындагы кырларда – үзләренең унике комбайны, өч арендага алынган комбайн эшли. Үзбушаткыч. Тагылмалы тракторлар. Бункерҗыйгычлар. КамАЗ ашлык бушатырга киткәндә, комбайн бер секунд та эшсез тормый: ашлыкны бункер-төягечкә бушата, ә ул инде икенче транспортка тапшыра.
– Бөтен техника бергә булганда уңайлы, – дип аңлата генераль директорның җитештерү буенча урынбасары Айдар Габделганиев. – Хезмәт күрсәтү дә, ягулык салу да, вак-төяк җитешсезлекләр булганда бербереңә ярдәм итү дә ансатрак.
Нәкъ менә шушы кырда рапс уңышы – гектардан 2,9 тонна. Хуҗалыкта әлегә уртача 2,4 чыга. Без килгән вакытта Питрәч районында сабан рапсы чәчелгән 3300 гектарның 1100 гектары җыеп алынган иде инде.
“Август-Теләче”нең барлыгы 7000 гектар җире бар. Күбрәк техник маржиналь культуралар чәчәләр: рапс, җитен – барысы да майга, барысы да югары өстәлгән бәя белән. Шулай ук сабан бодае һәм борчак чәчүлекләре дә бар.
– Ягулык белән проблема юк, – ди Габделганиев. – Алдан сатып алдык. Бер үк вакытта 232 тонна саклый алабыз.
Штурвал артында
Комбайннар кырга иртәнге алтыда чыгалар һәм чык төшкәнче – кичке сигезгә кадәр эшлиләр. Төшке, кичке ашны басуда ашаталар.
Рәмис Хәнәфиев – комбайнчы. Комбайнда алтынчы сезон эшли:
– Комбайн яхшы, проблема юк. Әгәр вак-төяк ватылу булса, инженерлар ярдәм итә – һәм эшне дәвам итәбез.
Хәзер рапс җыялар. Чиратта – арпа һәм җитен.
– Быел урып-җыю аеруча үзенчәлекле. Яңгырлар эшне тоткарлады, ләкин ашлыкны калдырып булмый. Барысын да башкарып чыгарга тырышабыз, – ди Хәнәфиев. – Иң мөһиме, техника ватылмасын. Ә комбайнчылар арасында ярышлар бара. Беркем дә калышырга теләми.
Питрәч районыннан предприятиедә тугыз кеше эшли. Генераль директор урынбасары Габделганиев тумышы белән Шәледән, Олан Илендә яши. Хезмәттәшләре дә якындагы авыллардан. Кешегә читкә еракка эшкә барып йөрергә кирәкми, районда эш урыннары булдырылган.
Ноу-тилл: Аз техника – күп табыш
“Ноу тилл” эшкәртү системасы – ул туфракны сукаламыйча гына эшкәртү. Генераль директор урынбасары Айдар Габделганиев, шәхсән үзе дә, шөгыльләнә башлаганчы, аның нәтиҗәлелегенә шикләнеп каравын әйтә.
– Технология техниканы азрак таләп итә, шуңа күрә чыгымнарны экономияләү бар. Ул башкаларга караганда яхшырак уңыш бирә, ягъни табыш күбрәк. Туфракның уңдырышлылыгы да яхшыра.
Узган ел “Август-Теләче” Чыты авылында база булдырды. Биредә контора бинасы төзелгән – кешеләр өчен кирәкле шартлар белән төзекләндерелгән. Шулай ук эремә ясагыч төзегәннәр. Элек һәр тракторчы ашламаны үз мичкәсендә үзе белгәнчә болгата иде. Хәзер – бер өйрәтелгән кеше махсус киемдә, респираторда, эремәне катгый рецепт буенча ясый. Әзер составны кырга илтергә һәм туфракка кертергә генә кала.
Саубуллашканда генераль директор урынбасары Габделганиев:
– Безгә егерме көн яхшы һава торышы булса, без урыпҗыюны һәм чәчүне тулысынча төгәлләячәкбез. Безнең рапс, җитен, сабан бодае калды, – диде.
