Мәктәп укучыларын йөзәргә өйрәтә башладылар

Район бассейны быел август аенда ачылды. Сентябрь аеннан биредә спорт мәктәбеннән бушлай дәресләр башланды, 4 төркем тупланды, алар составында 60тан артык бала –аларның бер өлеше балалар ваннасына, икенчесе инде олылар бассейнына йөри. Бушлай төркемгә эләгә алмаган балаларның әти-әниләре түләүле тренерга языла ала.
Октябрь аеннан шулай ук аквааэробика ачылды – бу дәресләр өлкәннәр өчен үткәрелә, олы кызлар өчен дә төркемнәр дә бар. Хәзерге вакытта булачак әниләр төркемен туплау бара.
- Узган атнадан без “Йөзү буенча гомуми укыту” республика программасына кушылдык, - ди бассейн директоры Виктор Курмышев. – Хәзер айга ике тапкыр ике сәгать буе башлангыч сыйныфларның физкультура дәресләре суда үтәчәк. Төп файда – балалар организмын савыктыру һәм, әлбәттә, аларны яхшы йөзәргә һәм суда үз-үзеңне тотукагыйдәләренә өйрәтәчәкбез.
– Бездә физкультура дәресләрен төрлеләндерү өчен үзенчәлекле мөмкинлек барлыкка килде. Мин укучыларга суда үз-үзеңне тотуның төп нигезләрен, йөзү дәресләрен бирәм, - ди физкультура укытучысы Павел Тихонов. – Балалар канәгать, барлык күнегүләрне бик теләп башкаралар.
Балалар суда шөгыльләнгәндә алар янында физкультура укытучысыннан тыш коткаручы һәм аларның сыйныф җитәкчесе булачак.
- Бассейн миңа бик ошый. Бина да шундый зур, матур. Әлегә без балалар зонасында, әмма тиздән барыбыз да яхшы йөзәргә өйрәнербез һәм өлкәннәр залы белән дә танышырбыз дип өметләнәм, - дип тәэсирләре белән уртаклаша беренче мәктәпнең 4 “Б” сыйныф укучысы Анастасия Кәбирова.
- Мин дә әйтергә телим! – дип шатланып сүзгә кушылды аның сыйныфташы Самат Хуҗиәхмәтов. – Биредә шундый яхшы, безгә бик ошый, рәхәтләнеп су коенабыз. Ничек шат булуымны сүзләр белән әйтеп бетереп булмый!
- Балалар, чыннан да, бик шат, - дип өсти укытучылары Таһирә Батдалова. – Без бүген биредә беренче тапкыр, ләкин мин балаларның күбесенең әти-әниләре белән йөргәннәрен беләм, шуңа күрә алар үзләрен суда уңайлы хис итәләр.