Алга
  • Рус Тат
  • Тормыш көзегез алтын булсын

    Өлкәннәр ункөнлегенең нәкъ менә көз көне үтүе очраклы түгелдер. Табигатьне дә хатын-кыз белән тиңләргә була. Анда да никадәр гүзәллек, мөлаемлылык һәм көч бар. Тик акрынлап бар нәрсә үзгәрә: сары төсләр күбәя, болытлар куера, кошлар да сайрамый башлый. Җир-анабыз да кешеләрне хезмәтләре өчен мулдан бүләкли.

    Кеше дә яшь, энергияле, көче булган чакта катлаулы мәсьәләләрне хәл итә, көченнән килмәслек эшләрне башкарып чыга. Ә вакыт агымсудай һәм сизелми дә гомер көзе  җитә. Лаеклы ялга чыгар вакыт җитә. Нәкъ менә бу чорда сине онытмаулары, искә алулары, очрашуларга чакырулары бик мөһим.
    Менә безне, ветеран пенсионерларны да, район мәдәният бүлеге йортына чәй табыны артына чакырдылар. Моннан берничә ел элек бу традиция юкка чыккан иде, әмма мәдәният бүлегенең яңа башлыгы Азат Фазылҗанов килгәч, яңадан барлыкка килде. Быел март аенда безне мәдәният хезмәткәрләре көненә чакырганнар иде инде. Ә бу юлы безгә чәй табыны гына түгел, ә искиткеч көзге бәйрәм оештырдылар! Мәдәният хезмәткәрләре генә шулай эшли белә. Сый-нигъмәтләр тулы өстәл әзерләнгән иде. “Селяне” хатын-кызлар вокал ансамбле, Илдар Кадриев, Валентина Ямщикова һәм Илнур Хәлимов дуэты башкаруындагы матур җырлар яңгырады. Бәйрәм кунаклары да тамашачылар булып кына калмадылар – Резеда Хәмидуллина лирик татар җырын башкарды. Илнурның бәйрәм дәвамында баянда уйнавы безне рухландырды  - барыбыз да бергә җырлашып утырдык һәм хәтта биергә дә чыктык.
    Ә иң мөһиме, бәйрәм белән котлап, Азат Фердинантович һәрберебезгә мөһим, изге теләкләр әйтте, киләчәккә планнар турында сөйләде.
    Ләйсән Сәгыйрова, һәрвакыттагыча, бу кичәне алып барды. Бер кунактан икенчесенә күчеп, яшь белгечләргә фикеребезне, теләкләребезне җиткерергә, узган эш елларын искә алырга мөмкинлек бирде.
    Мәдәният хезмәткәрләре профсоюзының район комитеты рәисе Сиринә Кәбирова һәм үзәкләштерелгән китапханәләр системасы директоры Земфира Әхмәтшина барлык ветераннарга сәламәтлек, шатлык-куанычлар теләде. Бүгенге көндә мәдәниятнең техник чаралар, аудио, видеоаппаратура белән ни дәрәҗәдә җиһазландырылуы турында сөйләде. Һәм бу тәкъдим дә ителде – безне истәлеккә фотога төшерделәр. Шунысы гаҗәп, 15 минуттан соң һәркемгә фото бүләк иттеләр.
    Өч сәгать бер мизгел кебек үтеп китте. Җылы мөнәсәбәттән, аралашудан, игътибардан ләззәт алып, талантлы яшь буын вәкилләре белән горурланып күтәренке кәеф белән өйләребезгә кайтып киттек. Район мәдәнияте ышанычлы кулларда һәм безне яңа казанышлар белән сөендерәчәк.
    Азат Фердинантовичка һәм мәдәният бүлегенең бөтен коллективына, үзәкләштерелгән китапханәләр системасы коллективына мондый искиткеч бәйрәм һәм ашамлыклар җыелмасы әзерләгәннәре өчен зур  рәхмәт!
    Бәхетле һәм сәламәт булыгыз! Барлык башлангычларыгызда уңышлар сезгә!

     

    Нравится
    Поделиться:
    Реклама
    Комментарии (0)
    Осталось символов: