Хәзер балалар бакчаларында күпкә уңайлы
Сабыйлар күп вакытларын балалар бакчаларында үткәрә, шуңа күрә һәр ата-ана баласына анда уңайлы һәм җылы булуын тели. Хәзер Кощак авылының «Теремок» балалар бакчасында капиталь ремонт бара. Ул республика программасы ярдәмендә берничә ай элек, май башында старт алды. Район үзәгендәге балалар бакчаларында ремонт эшләре төгәлләнгән инде, ата-аналар балаларын яңартылган, заманча мәктәпкәчә учреждениеләргә йөртә. Хәзер сабыйлар рәхәтләнеп укыйлар, уйныйлар.
Республика программасы кысаларында, Кощак авылының балалар бакчасында ун төрле ремонт эше алып барыла: фасадны, түбәне, керү төркемен, инженер-техник тәэмин итү системаларын, санитар узелларны ремонтлау, тәрәзә һәм ишек блокларын алыштыру, беренче кат төркемнәрендә идәнне җылыту, эчке һәм тышкы инженерлык челтәрләрен, коймаларны ремонтлау, якындагы территорияне төзекләндерү, шулай ук азык-төлек блогын ремонтлау эшләре башланды.
- Безнең балалар бакчасына кырык елга якын. Ул 1982 елда төзелгән. Биредә беренче капиталь ремонт 2006 елда үткәрелгән. Ләкин ул вакытта ул өлешчә башкарылган, фасад, түбә һәм җылылык системасы алыштырылган. Әмма хәзерге вакытта башкарыла торган ремонт күпкә зуррак, - дип сөйләде Кощакның «Теремок» балалар бакчасы мөдире Юлия Чебышова. - Безнең балалар бакчасында алты төркемдә 182 бала. Бездә Кощак авылы балалары гына түгел, якын-тирә җирлекләрдән дә киләләр. Капиталь ремонт вакытында балалар башка мәктәпкәчә учреждениегә йөри - безнең җитмешләп бала «Царево» поселогындагы «Ивушка» балалар бакчасына йөри, ә калган балалар әлегә өйләрендә, вакытларын гаиләләре белән үткәрәләр. Балалар бакчасында аларның урыннары, әлбәттә, саклана. Ремонт тәмамлангач, алар кире кайта алачак, - дип ассызыклады Юлия Чебышова.
Кыска гына вакыт эчендә барлык планлаштырылган эшләрнең туксан биш проценты башкарылган инде. Түбәсе алыштырылган һәм ишекләр куелган, беренче катта бизәкләү эшләре бара. Хәзерге вакытта икенче катта идәнгә линолеум җәелә. Эчке эшләрдән соң, кече формалар урнаштыру планлаштырыла.
Моннан тыш, бина эчендә кирпеч стеналарны, азык-төлек блогы бинасы түбәсен һәм эвакуация галереясен, азык-төлек блогы биналарын, вентиляция системаларын, бинаның цоколен ремонтлау, урамдагы уен мәйданчыкларын җиһазлау, шулай ук кухня җиһазлары - савыт-саба, мебель сатып алу һәм койманы ремонтлау буенча 12 миллион сумга якын өстәмә смета планлаштырылган.
- Безнең балалар бакчасының үзгәрүе, заманча төс алуы, әлбәттә, безне бик сөендерә. "Теремок" балалар бакчасында берничә буын тәрбияләнгән. Бинаның бөтен матурлыгын бәяләү өчен, ремонтның тәмамлануын түземсезлек белән көтәбез, - дип тәэсирләре белән уртаклашты яшь әниләр.
Районда барлыгы унбиш балалар бакчасы эшли. Республика программасы буенча дүрт мәктәпкәчә учреждение ремонтланды: берсе - Колайда һәм өчесе - Питрәчтә. Киләсе елга Татар Тау Иле һәм Иске Шигали балалар бакчаларында ремонт эшләре планлаштырылган.
Следите за самым важным и интересным в Telegram-каналеТатмедиа
