Питрәч районы Көек авылында яңа мәктәп ачылды

Көектә 1 сентябрь көнне «Алгоритм» лицее укучылар өчен үз ишекләрен ачты. Көек, Яңа Салмычи, «Светлый», «Яшьлек» торак комплексларыннан 1375 бала уку йортына килде. Аларны 75 педагог укытачак. Ярдәмче персонал саны - 25.

Тантаналы линейка беренче сыйныф укучылары өчен генә узды, алар 269. Балаларны 10 сыйныфка бүлделәр.

Бәйрәмдә традиция буенча мөхтәрәм кунаклар сәламләү сүзләре белән чыгыш ясадылар, беренче сыйныф укучылары шигырьләр сөйләделәр, тугызынчы сыйныф укучылары бию номерлары белән чыгыш ясадылар. Аннан соң төзелеш компаниясе җитәкчесе лицей директоры Лариса Глибинага ачкыч тапшырды. Аннары беренче кыңгырау, кызыл тасманы кисү... Һәм киң коридорлар, заманча интерьерлар, кабинетлар, зур бассейнлы заманча мәктәпкә рәхим итегез.

Җыелышка килгәч, мәктәпнең эчтән ничек булуын күрдек. Бик матур һәм иркен. Ул шундый булыр дип көтмәгән идек, - ди беренче сыйныф укучысының әнисе Эльвира Шәрифуллина.

Лицей технологик белем алуга өстенлек бирә. Биредә информатика, математика, физиканы тирәнтен өйрәнәчәкләр.

Район башлыгы Илһам Кашапов үз чыгышында билгеләп үткәнчә, уку йортын ярты ел эчендә, төгәлрәге 176 көн эчендә төзегәннәр.
Лицейның барлыкка килүе җирле халыкның кискен проблемасын хәл итте. Элек аларга балаларны Казан мәктәпләренә озак бөкеләр аша илтергә туры килә иде. Хәзер ул ике адымда урнашкан.

Тантаналы линейкада ТР премьер-министры Алексей Песошин катнашты. Ул район башкарма комитеты җитәкчесе урынбасары Азат Шаһисламов, төзелеш эшләре җитештерүче Гадел Мөхәммәтшинны Рәхмәт хаты белән бүләкләде һәм лицей җитәкчесенә 100 мең сумлык сертификат тапшырды.

Районда барлыгы 6095 укучы исәпләнә, шуларның 1015е – беренче сыйныф укучылары.
 

Тулы фоторепортажны сылтама аша кереп карый аласыз