Безнең районга дөньякүләм танылган автоузышчылар кайтачак

9 июльдә иртә белән анда катнашучылар Казанга кадәр килеп җитәчәк. Алар шәһәр урамнары аша узачак һәм безгә - Шәлегә таба юл алачак. Хәзер анда гаять зур әзерлек эшләре бара.
9 июльдә, иртәнге сәгать 10:00дә Шәледә дөньякүләм танылган автоузышчыларга старт биреләчәк. 157 километрлы махсус тизлек участогы Питрәч, Лаеш, Теләче, Балык Бистәсе һәм башка районнар аша Уфа шәһәренә таба юнәләчәк.
Безнең республика "Ефәк юл" раллие тарихында үзенчәлекле урынны алып тора. Шулай ук 2009 елда нәкъ тә монда беренче узышка старт бирелгән иде. Быел узышчылар Мәскәүдә старт алалар, ә узыш Кытайның Сиань шәһәрендә төгәлләнәчәк.
Узыш юлсызлык һәм гомум кулланылыштагы юллар аша үтә. Экипажның бурычы - тизлек участокларын билгеләнгән маршрут буенча максималь дәрәҗәдә тизрәк узу. Ә тизлек участоклары арасында куып китүләр гомум кулланылыштагы юллар аша барлык юл хәрәкәте кагыйдәләрен үтәп башкарыла. Шәле авылы янәшәсендәге мәйданда җанатарлар ярышта катнашучыларның ничек старт алганнарын күрәчәкләр. Моннан тыш, автоузышчылар киткәннән соң, монда Татарстан авто-мотоспорт Федерациясе тарафыннан оештырылган республика ярышлары башланачак.
Ә әлегә монда әзерлек эшләре бара, район башлыгы Эдуард Дияров катнашында зур киңәшмә үткәрелде. 3-5 мең кешедән торган кунакларны кабул итү өчен күп көч кую таләп ителә. Әлеге массакүләм чараны оештыруга җәлеп ителгән районның барлык хезмәтләре эшкә әзер.
- Бу бик җитди узыш, анда йөк машиналарыннан алып джипларга кадәр булган җитди автомобильләр катнаша. Моннан тыш, монда төрле интерактив мәйданчыклар, сәүдә үзәкләре, квадрациклларда йөрү, батутлар һәм башкалар булачак. 7 июльдән инде палаткалар, саклагыч киртәләр һәм башка кирәкле җиһазлар урнаштырыла башлаячак, - ди Татарстан Республикасы Спорт министрлыгының спорт массакүләм чаралары идарәсе башлыгы Эдуард Иванов.