Керәшен Сәрдәсе авылында Николай Александров китабын тәкъдир итү кичәсе узды

Һәвәскәр шагыйрь Николай Александров үзенең туган авылы Керәшен Сәрдәсендә «Һәр мизгелнең үз яме бар» дигән шигырьләр җыентыгын тәкъдим итте. Чара авыл мәдәният йортында узды. Залда шагыйрьнең дуслары, танышлары, авылдашлары җыелды. Башта тамашачыларга театральләштерелгән спектакль күрсәттеләр, аннары Николай Сергеевич үзенең иҗаты турында сөйләде. 

Җыентыкта соңгы берничә елда язылган йөздән артык шигырь бар. Алар туган як табигатенә, балачак еллары турындагы истәлекләргә һәм мәхәббәт лирикасына багышланган. 

- Күптәннән язам. Бишенче сыйныфта укыганда район газетасы редакциясенә үземнең шигыремне җибәрдем, аны бастырдылар, - дип искә ала Николай Сергеевич. - Барлыгы ике йөздән артык шигырь яздым, - ди ул. 

Бу авторның икенче җыентыгы. 

Николай Александров белеме буенча татар һәм рус телләре һәм әдәбияты укытучысы. Һөнәре буенча эшләгән. Шулай ук 18 ел диярлек шул ук район газетасының баш мөхәррире була, анда күп еллар элек аның шигыре беренче тапкыр дөнья күрә.