Мөслимә Сафина «Ак Барс» холдинг компаниясенең Мактау грамотасы белән бүләкләнде

Кул хезмәте заманча җиһазлар белән алышына. Бу авыл хуҗалыгы өлкәсендә дә хезмәтне күпкә җиңеләйтә һәм гадиләштерә. Ләкин кош тоту операторы Мөслимә Сафина эшнең җиңел булмавын таный, бигрәк тә хатын-кыз өчен.

– Башта ит эшкәртү цехында эшләдем, аннары кош тоту цехына күчтем. Көненә якынча 50 мең кош тотабыз. Безнең эш яңгырда да, кар яуганда да туктап тормый. Кошчылык фабрикасында инде 15 ел эшлим, өч елдан лаеклы ялга китәргә планлаштырам, – дип сөйли Мөслимә Мәсхүт кызы.

Ул еш кына кыйммәтле бүләкләр белән бүләкләнә, Мактау тактасына кертелә, өйдә күп грамоталары саклана.

– Әлбәттә, аларны алу рәхәт, бигрәк тә җитәкчеләр кулыннан, – дип нәтиҗә ясады әңгәмәдәшебез.