Питрәч аграийлары техника ремонтына кереште

«Ак Барс Питрәч», «Шәле-Агро» һәм «Агролак-К» крестьян-фермер хуҗалыкларында да ремонт тулы куәткә бара, моңа кадәр остаханәләрне җылыту һәм ремонтлау белән шөгыльләнгәннәр. Без Шәле предприятиесендә булдык. 

Көзге кыр эшләре тәмамлануга ук, техника ремонты башланды. Ремонт остаханәсендә инде 15 сентябрьдән эшлибез. Коры һава торган арада, мөмкин кадәр күбрәк эшләргә тырыштык. Элекке еллардагы кебек үк, слесарьлар бригадасы эшли. Монда токарь Фәйзи Кәримов, эретеп ябыштыручы Илсур Мөхәммәтшин, слесарьлар Мансур Морозов, Илгиз Әхмәтшин, Госман Мөхетдинов, Нияз Сәлахов һәм Илдар Шәрипов керә. Тәҗрибәле механизаторлар да, яшь хезмәткәрләр дә бар. Аларның кулларыннан бар эш тә килә, - дип билгеләп үтә идарәче Илназ Хөсәенов.

Аларда 4 ашлык җыю комбайны һәм 2 культиватор бар, барысы да кышкы саклауга куелган. Булган 140 тырма һәм 7 чылбыр ремонтланган. Тагын берничә авыл хуҗалыгы машинасы ремонтлыйсы бар әле, алар  үз чиратларын көтә, алар арасында кулдан эшләнгән биш каток та бар. Һәр техниканы этаплап ремонтлаячаклар.

Автопарк гел яңартылып тора, яңа техника кайта. Төзекләндерелгән техника белән язгы кыр эшләренә  вакытында керешербез дип өметләнәбез, - ди идарәче.

Моның өчен аларда  кирәкле  нәрсәләрнең барысы да бар: запас частьлар да, тәҗрибәле слесарьлар да. Шуларның берсе – механизатор Мансур Морозов, аның 42 ел хезмәт стажы бар. Аны хәзер дә ремонт остаханәсендә генә түгел, басуларда да күрергә мөмкин. Яшь коллегаларга һәрвакыт ярдәмгә килергә әзер.

Тракторда миңа хәзер авыррак, шуңа күрә 4 ел элек слесарь эшенә күчтем. Механизатор тәҗрибәсе бик булыша. Техниканы, туган авылым кырларын яхшы беләм, - ди Мансур.

Аның хезмәттәше Фәйзи Кәримов токарь булып эшли, аның да 40 елдан артык хезмәт стажы бар. Аңа берничә тапкыр эш урынын үзгәртергә туры килде, соңгы елларда ул кабат туган авылы Шәледә. 

Ремонтчылар соравы буенча мин болтлар, гайкалар һәм башка кирәкле запас частьлар ясыйм, - дип аңлата ул. - Әлеге эшнең нәтиҗәсе дә бар.

Механизатор һәм комбайнчы Фәнис Сафиуллин да техника ремонты белән мәшгуль.

Үзем эшли торган МТЗ-1221 тракторын ремонтладым. Слесарьлар һәм белгечләр ярдәме белән кыска гына вакыт эчендә җитешсезлекләрне бетерү мөмкин булды. Тимер атым кабат эшкә әзер, - диде ул. 

РАЙОН БУЕНЧА ЦИФРЛАР

269 тракторның яртысыннан  күбрәгенә ремонт таләп ителә, бүгенге көндә 19ы ремонтланды. 1303 тешле тырманың 200дән артыгы әзер. 97 культиваторның 82сенә ремонт кирәк, әлегә 5се ясалган. Әкренләп хуҗалыклар башка техниканы да ремонтлауга керештеләр. 67 комбайнның 46сы ремонтланачак. Әлегә кадәр комбайннарның тәгәрмәчләрен агарту һәм аларны кышкы саклауга кую турында кайгырттык, - дип сөйләде җитештерү-маркетинг бүлеге консультанты Василий Захаров.