Укучыларыбызны Татарстандагы иң яшь депутат белән таныштырабыз

Безнең хәбәрчебез яшь сәясәтчедән интервью алды.

- Татьяна, үзегез турында кыскача гына сөйләгез әле. Сез хәзер укыйсызмы? Эшлисезме?

- Мин Казан авиация институты студенты. Дүртенче курста укыйм. Хәзерге вакытта эшләмим. Элек Белкино авыл мәдәният йорты директоры булдым.

- Шунысы кызык, ни өчен сез депутат булырга карар кылдыгыз?

- Мин бу хакта бик озак уйладым. Минем өскә зур җаваплылык йөкләнәчәген белдем. Әмма соңыннан шуны аңладым - бу авыл тормышын яхшы якка үзгәртү өчен менә дигән мөмкинлек. Бигрәк тә яшьләргә ярдәм итүдә. Моннан тыш, бу минем өчен яхшы тәҗрибә дә. Мин дәүләт эшчәнлегенең үзенчәлеген тирәнтен беләчәкмен.

- Сезнең фикерегезчә, депутат эшендә иң мөһиме нәрсә?

- Халык ышанычын аклау, димәк, район халкы һәм җитәкчелеге арасында арадашчы булу дигән сүз. Шуңа күрә депутат эшендә иң мөһиме – кешеләрне ишетү һәм тыңлау, дип уйлыйм. Аларга идеяләрне тормышка ашырырга ярдәм итү.

- Сезгә халыктан нинди дә булса тәкъдимнәр килдеме инде?

- Әйе, әлбәттә. Иң кызыклысы - чүп-чарны аерым җыюны оештыру һәм аны алга таба гамәлгә ашыру мәсьәләсе. Идеяне яшь егет белдерде. Димәк, яшьләрне экология проблемасы борчый. Без, һичшиксез, бу тәкъдимне караячакбыз. Аны район җитәкчелегенә тапшырачакбыз.

- Ничек уйлыйсыз, питрәчлеләрне барыннан да бигрәк нинди сораулар борчый?

- Миңа калса, бу авылда эш урыннары җитмәү. Күп кенә танышларым, дусларым туган җирдә яшәргә һәм үсәргә тели. Әмма үсеш алу мөмкинлеге юк. Аларны бу туктатып кала да инде.

- Сәяси эшчәнлектә киләчәккә планнарыгыз нинди?

- Планнар зур.  Әмма алар сер булып калсын. Алда 5 ел киеренке эш. Мин җирле халыкның өметен аклармын дип ышанам.