Хөкүмәт иң яхшы укытучыларга премияләр санын арттырды
Конкурста җиңүчеләр саны 1 меңнән 1 250гә кадәр җитәчәк.
Россия Премьер-министры Михаил Мишустин педагогик эшчәнлектәге казанышлары өчен иң яхшы укытучыларга премияләр санын арттыру турында карар имзалады.
«Педагогик эшчәнлектәге казанышлары өчен иң яхшы укытучыларга премияләр бирү конкурсында җиңүчеләр саны 2023 елдан башлап 1 000нән 1 250 кешегә кадәр артачак. Бу хакта карарны хөкүмәт рәисе Михаил Мишустин имзалады», – диелә хәбәрдә.
Билгеләп үтелгәнчә, бәйге төбәк дәрәҗәсендә үткәрелә, җиңүчеләр 200 мең сум күләмендә премия ала. Аны бирүнең төп критерийлары: укытучының үз методик эшләнмәләре булу, укучыларының нәтиҗәләре һәм казанышлары, төрле категорияле укучылар белән адреслы эш, мәсәлән, инвалид балалар белән.
Конкурста белгечлеге буенча өч елдан артык эшләүче укытучылар катнаша ала. Ел саен премия алуга бөтен Россиядән дүрт меңгә якын педагог дәгъва итә. Конкурс 2006 елдан бирле үткәрелә.
Җиңүчеләр өчен премияләр санын арттыру турында карарны хөкүмәт Россия Президенты йөкләмәсеннән соң кабул итте. РФ Дәүләт Советы утырышында төбәкләрнең гомуми белем бирү өлкәсендәге бурычлары тикшерелде.
«2023-2025 елларның федераль бюджетында бу максатларга ел саен 250 миллион сум каралган», – дип язылган хәбәрдә.
Россия Президенты Владимир Путин 2023 елны Укытучылар һәм остазлар елы дип игълан итте. Бу елда дистәләгән чаралар үткәрү планлаштырыла, педагогик һөнәрләрнең абруен күтәрү һәм популярлаштыру, остазлык институтын үстерү, шулай ук яшьләрне профильле югары уку йортларына җәлеп итү аларның максатлары булып тора.
Следите за самым важным и интересным в Telegram-каналеТатмедиа
