Питрәч районында аварияләрдә һәлак булучылар саны ике тапкырга кимегән

2026 елның беренче яртыеллыгында Питрәч районында юлларда парадоксаль тенденция күзәтелде: аварияләр һәм зыян күрүчеләр саны артты, юлтранспорт һәлакәтләрендә һәлак булучылар саны ике тапкырдан артыкка кимеде. Кайсы участокларның иң куркыныч булуы, “Казан бөкеләре”нең ничек райондагы аварияләргә йогынты ясавы һәм гади гражданнарның смартфоннары ЮХИДИгә хокук бозучыларга каршы көрәшергә ярдәм итүе турында район ЮХИДИ идарәсе башлыгы полиция майоры Рәмис Аллямов сөйләде.

Алты айда район юлларында зыян күрүчеләр белән 38 юл-транспорт һәлакәте теркәлгән (узган елның шул чорында 32 булган). Җәрәхәтләнүчеләр саны 49 кешегә кадәр арткан (2025 ел күрсәткечләренә карата 10 кешегә күбрәк). Шул ук вакытта төп күрсәткеч сөендерә – һәлак булучылар саны биштән ике кешегә кадәр кимегән.

Әмма матди зыян китергән аварияләрне исәпкә алганда, гомуми күренеш борчулы: 2025 елның беренче яртыеллыгында шундый 594 юл-транспорт һәлакәте теркәлгән булса, 2026 елда бу сан 727гә җиткән. Рәмис Аллямов әйтүенчә, инде вакыйгалар турындагы материаллар папкасына документлар сыймый башлаган.

Аварияләр анализы районны куркыныч зоналарга аера:

1. “Мәскәү-Уфа” федераль трассасы – һәлакәтләр саны буенча абсолют лидер. Биредә 16 юл-транспорт һәлакәте булган (узган ел белән чагыштырганда 2 тапкырдан артыграк үсеш), 20 кеше зыян күргән.

2. “Казан-Шәмәрдән” төбәк юлы – 3 юл-транспорт һәлакәте, 4 зыян күрүче, 1 һәлак булучы.

3. Җирле автомобиль юллары – 19 юл-транспорт һәлакәте, 25 зыян күрүче.

ЮХИДИ башлыгы район юлларында аеруча куркыныч булган вакытларны – атнаның билгеле бер сәгатьләрендә һәм көннәрендә төгәл закончалыкны ачыклады.

– Иң куркыныч көн – җомга. Бу көнне Казаннан районнарга – Питрәч, Шәмәрдән, Чаллы га массакүләм сәяхәт башлана. Көн саен иң куркыныч сәгатьләр – 15:00дән 20:00гә кадәр. Сәбәбе - юлда автомобильләрнең күп булуыннан тыш, эш көненнән соң арыган, башкаладагы бөкеләрдән соң нервланган һәм өйләренә ашыгучы машина йөртүчеләр концентрацияне югалтуы. Нәкъ менә шул вакытта иң авыр бәрелешләр була.

Моннан тыш, төнге һәм иртәнге сәгатьләр юлларга кыргый хайваннар килеп чыгу куркынычын тудыра. Пошиларны бәрдерүләр даими теркәлә, ЮХИДИ һәлакәтләрне рәсмиләштерү өчен егерьлар һәм Росгвардия белән хезмәттәшлек итә.

Балаларның юл-транспорт травматизмы үсүен дәвам итә. Ярты ел эчендә балалар катнашында 14 юл-транспорт һәлакәте булган (узган ел 8), аларда 14 балигъ булмаган бала зыян күргән.

Районны тетрәндергән фаҗига 28 мартта 21:45 сәгатьтә “Казан-Шәмәрдән” трассасының 21 нче километрында була. 16 яшьлек кыз көйләнгән җәяүлеләр кичүеннән юл аша чыга. Светофор һәм яктырту эшләмәгәнлектән, “Киа Оптима” автомобиле йөртүчесе яшүсмерне күрми һәм бәрдерә. Бала урында ук үлә.

– Светофорны һәм яктырткычларны ремонтлаудан тыш, – ди Рәмис Аллямов, – ЮХИДИ нәкъ менә шушы кичүдә стационар фото һәм видеофиксация комплексы урнаштыру инициативасы белән чыкты.

ЮХИДИ хезмәткәрләре күңелсез тенденцияне билгели: балалар туктап торган яки хәрәкәт итүче автомобильләр арасыннан көтмәгәндә килеп чыга. Чабып чыгарга яки самокатларда, велосипедларда һәм электр транспортында йөрергә мөмкиннәр. Машина йөртүче аларны күрми, баланы бәрдерергә һәм ул җәрәхәтләнергә мөмкин. Бу куркыныч турында хезмәткәрләр мәктәпләрдә һәм балалар бакчаларында сөйли, әти-әниләренә мөрәҗәгать итә, әмма әлегә тенденцияне үзгәртә алмыйлар.

– Барлык автомобиль йөртүчеләргә бер очракны мисал итеп әйтәсе килә, – дип аңлата ЮХИДИ башлыгы. – Күптән түгел Аркатау борылышында бәрелеш булды. “Лада Гранта” машинасында арткы утыргычтагы бала автокреслода дөрес эләктерелгән булган. Каты бәрелү вакытында баланың бер җире дә сыдырылмаган, бу чираттагы тапкыр балаларны эләктерү җайланмаларының тормыш өчен әһәмиятле булуын исбатлый.

ЮХИДИ хезмәткәрләре физик яктан юлның барлык участокларында да була алмый, ярдәмгә гражданнар үзләре килә. Күзәтчелек эшчәнлегендә төп алгарыш – “Халык инспекторы” кушымтасын массакүләм куллану.

Нәкъ менә битараф булмаган машина йөртүчеләрдән видеофиксация ярдәмендә каршы хәрәкәт полосасына чыгу өчен төзелгән беркетмәләр саны 182дән (2025 елда) 664кә (2026 елда) кадәр җитте.

– Кайчак кайбер машина йөртүчеләр кагыйдәләрне үтәргә чакыруны аңламый. Ләкин салынган штраф аларны аңга китерә. Нәкъ менә “Халык инспекторы” ярдәмендә быел каршы як полосага чыгып, авыр нәтиҗәләргә китергән юл-транспорт һәлакәтләре бөтенләй теркәлмәде, – дип ассызыклый Рәмис Аллямов.

Район халкы ЮХИДИга юл челтәре проблемалары белән актив мөрәҗәгать итә. Кышын һәм язын инспекторлар прокурор белән берлектә юлдагы чокырларны тикшерергә чыгып, юлларны баланста тотучыларга актлар төзегәннәр (штрафлар 30 000 сумга җиткән).

Хәзер көн тәртибендә гражданнар мөрәҗәгатьләре. Еш кына халык ясалма тигезсезлекләр урнаштыруны сорап мөрәҗәгать итә. ЮХИДИ искәртеп узганча, ГОСТ буенча аларны мәктәп, балалар бакчалары янында һәм юлтранспорт һәлакәтләре күп булган урыннарда гына урнаштырырга мөмкин. Мәсәлән, аларны хастаханә янында урнаштырырга ярамый – алар “ашыгыч ярдәм” хәрәкәтенә комачаулыклар тудырачак.

“Казан-Шәмәрдән” юлы өстендә яшәүче Иске Шигали халкы трасса буенда тавыштан саклаучы экраннар урнаштыруны сорый, чөнки юл торак массивларга якын үтә. Республикада мондый карарларның прецедентлары бар, шуңа күрә мәсьәләне уңай хәл итүгә өмет бар.

Тулаем алганда, Питрәч районы Казаннан транзит юлда булганга, гаять зур йөкләнеш кичерә, дип нәтиҗә ясап була. ЮХИДИ җитәкчелеге билгеләп үткәнчә, мәктәпләрдә куркынычсызлык турында лекцияләр белән генә проблеманы хәл итеп булмый. Инженерлык чишелешләре (камералар, яктырту, төнлә яктыртыла торган термопластик белән тамгалау), системалы автоматик контроль һәм гражданнар уяулыгы кирәк.

Ярты ел эчендә барлыгы 3623 юл хәрәкәте кагыйдәләрен бозу очрагы теркәлгән. Шулардан: Куркынычсызлык каешын эләктермәү – 739. Каршы як полосага чыгу – 664. Җәяүлеләргә өстенлек бирмәү – 127. Җәяүлеләр тарафыннан юл йөрү кагыйдәләрен бозу – 118. Балалар креслосы булмау – 108. Исерек килеш руль артына утыру – 62. Транспорт чарасы белән хокуксыз идарә итү – 45.