Питрәч районында ун елдан артык ирекле халык дружиналары эшләп килә. Әлеге иҗтимагый эшкә 530 кеше җәлеп ителгән, шуларның 50се таныклык алды.
Район үзәгенең балалар бакчалары һәм мәктәпләре вәкилләренә тантаналы рәвештә таныклыклар тапшырдылар. Аларны әлеге вакыйга белән район башкарма комитеты җитәкчесе урынбасары Зимфира Мөхәммәтгәрәева котлады.
- Сез көн саен районның эчке эшләр хезмәткәрләренә актив ярдәм итәсез. Бу иҗтимагый эш. Аны зур җаваплылык белән башкаруыгыз өчен зур рәхмәт, - дип билгеләп үтте ул.
Бу көнне таныклык алучы "Каенкай" балалар бакчасы тәрбиячесе Алсу Сөнгатуллина өченче елын халык дружинасында тора. Аның әйтүенчә, айга бер тапкыр кизү торырга туры килә.
- Әлеге эшкә карашым уңай. Без полиция хезмәткәрләренә һәрвакыт ярдәм итәргә әзер, - дип билгеләп үтте Алсу Харисовна.
Лилия Шәрәфетдинова да әлеге эшне кабат яңартуларына бик шат.
- Элек тә халык дружиналары бар иде. Әмма бу эшне ташладылар. Һәм менә бүген питрәчлеләр полиция хезмәткәрләренә тәртип сакларга ярдәм итә, - ди ул.
530 ирекле халык дружинасы таныклык алачак. Аларны таныклыклар әзерләнеп бетүгә тапшырачаклар. Яңа үрнәктәге таныклыклардан тыш, яңа жилетлар да әзерләгәннәр. Алар яктылык кайтаргыч элементлар белән эшләнгән. Җәмәгать тәртибе сагы бүлегенең өлкән инспекторы, полиция майоры Гаяз Минһаҗев сүзләренә караганда, ирекле халык дружиналары эше алга таба да дәвам итәчәк.
- Бүген бу бик актуаль тема. Башка районнар белән чагыштырганда, Питрәч районында халык дружиналары тулысынча комплектлаштырылган. Питрәчлеләр райондагы тәртип һәм куркынычсызлыкка битараф түгел, - дип аңлатты ул.
Шуны әйтергә кирәк, әлеге җәмәгать эшендә район үзәгенең барлык оешма һәм учреждениеләре катнаша. Алар авыл җирлекләрендә дә эшли.
Иң мөһим һәм кызыклы язмаларны Татмедиа Telegram-каналында укыгыз
