Һәркем өчен иң кадерле җир

Әниләр көненә багышланган бәйге кысаларында, район мәдәният йорты сәхнәсенә төрле авыллардан җиде искиткеч гаилә чыкты.
- Кадерле әниләр! Сез бу дөньяны чиксез мәхәббәтегез белән җылытасыз, - дип мөрәҗәгать итте кунакларга район башкарма комитеты җитәкчесе урынбасары Зимфира Мөхәммәтгәрәева. - Гаиләләрегездә һәрвакыт аңлашу, имин тормыш хөкем сөрсен, сәламәт һәм бәхетле булыгыз!
Ул шулай ук залдагы хатын-кызларга чәчәкләр һәм бүләкләр тапшырды. Аларга ныклыклары һәм фидакарь хезмәтләре өчен рәхмәт белдерде. Болар: тыл ветераннары, фронтовик тол хатыннары.
Бәйге кунаклары Рушана һәм Альберт Шеваловскийлар үз гаиләләре турында бик үткәзеп сөйләделәр. Ә катнашучыларның һәрберсе уен-көлке, җыр, шигырь формасында үз гаиләсен тәкъдим итте. Болар: Татар Казысыннан Вәлиевлар, Питрәчтән Шәйдуллиннар, Иске Йорттан Шәрәповлар, Күннән Нәбиуллиннар, Колайдан Елизаровлар, Ленино-Кокушкинодан Миңнуллиннар, Богородскидан Сәлимгәрәевлар. Алар тамашачыларга үз талантларын күрсәтте. Бәйгеләрдә катнашучылар шулкадәр төрле иде ки, хөкемдарлар җиңүчене сайлап алуның кирәге юк, дигән фикергә килделәр. Монда мәхәббәт, дуслык һәм гаилә җепләренең ныклыгы җиңде.
Бәйгедә катнашучылар үзләре дә бик күп тәэсирләр алды:
- Миңа бик ошады, бик кызык булды, - дип тәэсирләре белән уртаклашты Нәбиуллиннар гаиләсе. - Без чыгышларыбызны гаҗәеп бәйрәм - Әниләр көненә һәм әниләребезгә багышладык. - Без бәйгедә беренче тапкыр. Кызларыбыз артист, төрле чараларда катнашалар, ирем белән тәүге чыгышыбыз, - дип сөйли Алсу Сәлимгәрәева. - Бу безне тагын да якынайтты.
- Мин бик каушадым, - дип сүзгә кушылды гаилә башлыгы Рөстәм. - Әзерләнергә вакыт аз иде. Чыгыш ясар өчен эштән 400 километр араны кайттым. Әмма һич тә үкенмим. Без күп тәэсирләр алдык.
- Кешеләргә кайчакта бергәләп җыелырга кирәк. Бигрәк тә шушындый бәйрәм уңаеннан, - дип сүзгә кушылды Елизаровларның әбиләре Наталья апа.