Көектә табиб амбулаториясе барлыкка киләчәк

Бу авылда «Светлый» торак комплексы барлыкка килгәч, анда яшәүчеләр саны көннән-көн арта бара. Хәзерге вакытта биредә рәсми рәвештә 12038 кеше теркәлгән. 

Бүгенге көндә ярдәм сорап мөрәҗәгать итә ала торган иң якын медицина учреждениесе - кечкенә генә фельдшер-акушерлык пункты. Анда нибары 2 табиб-педиатр һәм терапевт эшли. Халыкка күп сандагы пациентларга исәпләнмәгән бина һәм медперсонал җитми. Шуңа күрә кайберәүләр әле элекке яшәү урыны буенча хастаханәләргә теркәлгән, ә анда йөрергә ерак. Питрәч үзәк район хастаханәсенә бару тагын да озаграк, чөнки юл Казан яки Богородск аша уза, ә аннары район үзәгенә тагын 20 километрга якын юл. Шуңа күрә биредә табиб амбулаториясен ачуны сорап инде берничә ел мөрәҗәгать итәләр. Яңа медицина учреждениесе иркен булачак, аның мәйданы 4518 метр тәшкил итәчәк. Урыннар күп булачак, димәк, медиклар саны артачак, алар көненә 100 пациентны кабул итә алачак.
Бина март аенда төзелә башлады. Объектта, гомумән алганда, 22 кеше эшли – ташчылар, монолитчылар, ярдәмче эшчеләр бригадасы – инде фундамент салганнар, беренче катны күтәргәннәр, бу көннәрдә икенчесенә керешәчәкләр. Техникадан 2 күтәрткеч кран, төягечләр җәлеп ителгән. 
Бина өч катлы булачак. Аны ел ахырына кадәр, төгәлрәге ноябрьдә тапшырырга тиешләр.
- График буенча, көчәйтелгән темпта, ялларсыз эшлибез. 15 августка стеналарны тулысынча күтәрергә, түбәне ясарга һәм эчке бизәкләү эшләренә керешергә планлаштырабыз, - дип билгеләп үтте төзелеш компаниясе вәкиле Евгений Луговкин.
Территорияне төзекләндерү дә булачак: медучреждениегә юл салыначак һәм 18 автомобильгә исәпләнгән парковка булдырылачак.
Объект «Сәламәтлекне саклау» илкүләм проектының «Сәламәтлек саклауның беренчел звеносын модернизацияләү» федераль проекты хисабына төзелә.