Сигез кешене үтерүдә гаепләнүче Рамил Шәмсетдиновка хөкем карары чыгардылар

Чита шәһәрендә Икенче көнчыгыш хәрби суды солдат-срочник Рамил Шәмсетдиновны хезмәттәшләрен атып үтерүдә гаепле дип тапты. Бу турыда РИА Новости хәбәр итте.

«24 ел алты айга каты режимлы колониягә ирегеннән мәхрүм ителә», — диде суд вәкиле хөкем карарын әйткәндә.

Ул шулай ук зыян күрүчеләргә компенсация түләргә тиеш. Дүрт кешенең һәрберсенә бер миллион ярым сум, ике кешегә һәрберсенә 1,3 миллион сум, бер кешегә 1,2 миллион сум.

Агентлык хәбәр иткәнчә, Шәмсетдинов хөкем карарын тыныч кына тыңлаган.

2019 елның 25 октябрендә Байкал аръягындагы хәрби частьтә Төмәннән килгән солдат Рамил Шәмсетдинов атыш оештырды. Биредә сигез кеше үлде, тагын ике кеше җитди яраланды. Рамил үз гамәлен хәрби частьтә "бабайлык һәм көч куллану" белән аңлаткан. Ул гаебен таный, психолого-психиатрия экспертизасы аны үз акылында дип таба.

Былтыр декабрь азагында присяжныйлар бертавыштан срочник Шәмсетдиновны «Байкал аръягы хәрби частендә ике һәм аннан да күбрәк кеше үтерүдә һәм хезмәттәшләренә һөҗүм итүдә гаепле, әмма мәрхәмәткә хокуклы» дип тапкан иде.

Интертат