Бу юлы питрәчлеләр бишенче урында

Хоккей. Уфалылар - җиңүче

Өч көн дәвамында "Питрәч-Арена" боз сарае гөрләп торды. Яшь хоккейчылар бозда үзара көч сынашты, ә җанатарлар аларга уңыш теләде. Яшүсмерләргә тугыз гына яшь булуга да карамастан, алар яхшы уен күрсәтте. Турнир кунаклары турнирдан канәгать калды.

- Без әлеге турнирда катнашу өчен озын юл үттек, - диде Уфадан килгән җанатар Елена. - Безнең команда да улым Андрей уйный, аның өчен борчылдым. Шунысы сөендерә, без җиңдек. "Пестрецы" авыл командасының шәһәр командалары белән бер дәрәҗәдә уйнаулары гаҗәпләндерде безне.

"Молот" командасыннан (Пермь) Матвей Казаков хоккейчы булырга хыяллана:

- Мин өч яшьтән яраткан спорт төрем белән шөгыльләнәм, бозга һәрвакыт җиңү максаты куеп чыгам, һәрвакыт яхшы уен күрсәтергә тырышам. Кайчан да булса оста хоккейчылар командасында уйнарга хыялланам.

Турнирда Уфадан "Салават Юлаев" командасы җиңде. Ул барлык матчларда да җиңү яулады. Икенче урында "Дизель" командасы (Пенза), өченче урында - "Молот", дүртенче урында - "Ак Барс" (Казан), бишенче урында - "Пестрецы" (тренер Виктор Сорокин) һәм алтынчы урында - "Ижсталь" (Ижевск) командсы.

Безнең хоккейчылар бер уенда гына җиңде, "Молот" командасын - 4:1 исәбенә. Калган уеннарда оттырдылар: уфалыларга - 2:7, "Дизель" командасына - 1:8, "Молот"ка - 0:14, "Ак Барс"ка - 2:4 исәбенә.

Биатлон. Барысын да чаңгы юлы хәл итте

Стадионда наратлыкта Советлар Союзы Герое Василий Осипов исемендәге призга мәктәп укучылары һәм Казан машина төзелеше техникумы филиалы студентлары арасында биатлон буенча район беренчелеге үтте. Аны РО ДОСААФ оештырды.

Стартка 11 командадан 30дан артык яшь спортчы чыкты. Алар 3 километр (кызлар) һәм 4,5 километр (егетләр) арада ярышты. Ярышта катнашучылар беренче әйләнештән соң ятып, икенче әйләнештән соң баскан килеш пневматик мылтыктан аттылар. Мишеньга тидерә алмаган саен аларга штраф минутлары билгеләнде. Шуңа күрә барысы да мишеньгә тидерергә тырышсалар да, төз ата алмадылар. Нигездә призлы урыннар чаңгы юлында билгеләнде.

Җиңүче һәм призерлар: Гөлшат Кашапова (ШӘле), Алевтина Блаченова (Ленино-Кокушкино), Арина Сорокина (Пановка). Рифат Гайнуллин (Ленино-Кокушкино), Айзат Сафин (Казан машина төзелеше техникумы филиалы) һәм Альберт Мөхәммәтдинов (Ленио-Кокушкино).

Команда исәбендә ленинококушкинолылар беренчелекне алды, икенче урында - Шәле, өченче урында - Казан машина төзелеше техникумы филиалы командасы.