Район игенчеләре көннәр яхшыруга сабан культуралары чәчүгә кереште.
- Быел язгы кыр эшләре өчен һава шартлары бик яхшы, - ди авыл хуҗалыгы һәм азык-төлек идарәсе башлыгы урынбасары Газинур Фәйзуллин. - Район игенчеләре эшкә кереште һәм сабан культуралары чәчү тулы куәткә бара. Әлегә район кырларында 25 чәчү агрегаты эшли, тиздән чәчүгә әзерләнгән барлык 43 агрегат та кырга чыгачак. Хуҗалыклар орлык һәм ягулык-майлау материаллары белән тулысынча тәэмин ителгән, эшләргә генә кирәк. Сүз уңаеннан, уҗым культураларын (бөртеклеләр һәм күпьеллык үләннәр) өстәмә тукландыру һәм тырмалауны уңышлы тәмамладылар. Хәзер план буенча чәчү өчен туфрак әзерләү бара. Уҗым культуралары торышы сөендерә, арыш яхшы кышлаган. 1000 гектарга якын уҗым бодаен гына яңадан чәчәргә кирәк булачак. Кызу көннәрдә кырда эшләүче механизаторлар уңышның үзләренә бәйле булуын яхшы аңлый.
"Соя Колай" хуҗалыгында сабан культураларын чәчүгә майның беренче көннәрендә үк керештеләр.
- Без 5 майга 120 гектар мәйданда арпа чәчтек, 4 майда кукуруз чәчүгә керештек. Безнең хуҗалык терлекчелек белән шөгыльләнә, шуңа да әлеге культура бездә зур мәйдан - 1000 гектар биләп торачак, - ди хуҗалыкның баш агрономы Рәмзил Вәлиев. - 1200 гектардан артык мәйданны бөртеклеләр һәм азык катнашмасы алып торачак. Әлегә бездә ике чәчү агрегатында Хәетбай Дощчанов һәм Владимир Батурин эшли. Юрий Агачев ашлык ташу белән мәшгуль. Чәчү агрегатлары өчен туфракны Валерий һәм Виталий Чубаевлар, Рөстәм Насыйбуллин әзерли. Алар иртәнге сәгать 4тән кичке сәгать 11гә кадәр кырда. Алар өчен көненә өч тапкыр ашату оештырылган. 25 майга кадәр эшне башкарып чыгарбыз дип уйлыйбыз. Иң мөһиме, һава шартлары, туфрак яхшы.
Районда сабан культуралары 37000 гектар тәшкил итә (шулардан 24700 гектарында бөртеклеләр). Бүгенгә 4800 гектарда бөртеклеләр чәчелгән. Алда баручы хуҗалыклар: "Ак Барс-Питрәч" - 2163 гектар, "Газовик" - 350 гектар, "Кощак" АХП - 216 гектар һәм "Соя Колай" - 120 гектар.
Иң мөһим һәм кызыклы язмаларны Татмедиа Telegram-каналында укыгыз
